*فاكر يا بيتر لما حضرنا فرح محمد ورحنا شبكه تريز بنت خالتك ام جورج*
----------
*اتغدينا عند خالتي ام محمد واتعشينا عند خالتك أم جورج*
---------
*أنا صليت علي نبينا محمد وانت قدست المسيح ويا جورج*
----------
*كل سنه وانتم طيبين وفرحانين دي كلمه تنحس ما تنكتبش*
--------
*والبت مريم تقولك وسع وتبص لهنا وتقول العيال دول طرش*
---------
*وتضحك لما مينا قلها عقبالك وتقول وهيا بتعدي ما يحكمش*
--------
*خالك حنا ضحك قام وقف وقال العيال دي قعدتهم ما تسترش*
--------
*هروح اجيب المره من فرح محمد اصلها لما تقعد مره ببرش*
----------
* جدتك جمانه قامت مسكت فيه عيب تيجي عندنا وما تاكلش*
---------
*عيب انتا بتشتمنا وحياه المقدس والمسيح الحي ما تخرجش *
---------
*فاكر يا بيتر لما حضرنا فرح محمد ورحنا شبكه تريز بنت خالتك ام جورج*
----------
*وعمك ابراهيم مؤزن الجامع ليه ما جاش و محضرش*
-------
*روح يا أدوارد نادي عليه بسرعه ومن غيره ما ترجعش*
--------
*كانت ست رصينه جدعه وجامده وقت الجد ما تهظرش*
----------
*وخالتك فوزيه بزغروده حلوه من غيرها ما تسمعش*
----------
*والحاجه فاطمه بصينيه فراخ وبط داخله ما تتعوضش*
---------
*وأم هشام بسبت مليان وقزايز شربات متتوصفش*
----------
*وأم حماده بصينيه رقاق من حلاوته محشي أه متعرفش*
---------
*والناس رايحه جايه من باب لباب فرح ما تسكتش*
--------
*وعمك عزيز بسلمه يعلق زينه أفراح ولا لمبه ما نورتش*
--------
*وزينه ولولا علي انغام ما تزوقيني يا نينا ما بطلتش*
-------
*ويا مسافر بورسعيد ويا حلو صبح يا حلو طل منطفتش*
---------
*فاكر يا بيتر لما حضرنا فرح محمد ورحنا شبكه تريز بنت خالتك ام جورج*
---------
*الجواز دلوقتي جهاد ومتعه وعرفي ويصورها فيديو وعلي اي فرش*
---------
*اتنين يتقابلوا يضربوا ورقه في أي حته وغش في غش*
---------
*وفساتين قصرت وبناطيل اضيقت وحزام يداري كرش*
---------
*فاكر تلفزيونا ابو بكره قناتين مره تجيب ومره متجيبش*
----------
*كان اخترنا لك والشعراوي واحمد فراج غيرهم منعرفش*
----------
*ومصطفي محمود ونادي السيما وشويه نكت متضحكش*
-------
*وبسلامته تلاتين سنه يخطب فينا التلفزيون غيرناه وهو متغيرش*
-------
*كان يطلع يخطب فينا وكأنه حمار بيحش في البرسيم حش*
--------
*وتاني يوم تطلع جرايده تكدب وتفتح مشاريع متفتحتش*
----------
*اما اليومين دول كترم وبالريموت والرسيفر متلحقش*
---------
*الست نهله واحمد جاموسه ومرتضي بربور والعكش*
-------
*وداعش وجاحش وجيش حر واعلام نصاب مبيفهمش*
----------
*وتقلب في قنوات الكدب وان كنت حمار ما تشبعش*
---------
*وثورتين وزروا علينا عصام قرف ومن كبش لكبش*
--------
*قاطونيل والجنزوري والفشلاوي وكله ما بيعرفش*
-----
*وختموها بمحلب بتاع النظام الل اتقلش وما تقلش*
----------
*فاكر يا بيتر لما حضرنا فرح محمد ورحنا شبكه تريز بنت خالتك ام جورج*
-------
*أل وجي دلوقتي عايز يفرقنا ابن الكلب الل ما بيفهمش؟*
ومش عجبي
negm maher negm
